Татарстан елгаларында су дәрәҗәсе бер метрдан артыкка күтәрелде
Россия Гадәттән тыш хәлләр министрлыгының Татарстан буенча Баш идарәсе мәгълүматларына караганда, соңгы тәүлектә Зөя елгасында һәм аның кушылдыкларында су биеклегенең сизелерлек күтәрелүе теркәлгән — ул 73 сантиметрдан алып 155 сантиметрга кадәр җиткән.
Кама алды елгаларында су 15–68 сантиметрга, ә Туйма елгасында 111 сантиметрга күтәрелгән.
Кама аръягында да шундый ук хәл күзәтелә: күпчелек елгаларда су 17–87 сантиметрга югары күтәрелгән. Аеруча Кече Чирмешән елгасында (+124 сантиметр) һәм Актай елгасында (+227 сантиметр) суның интенсив рәвештә артуы игътибарга лаек. Шул ук вакытта Мәллә, Минзәлә һәм Ык елгаларында су, киресенчә, бераз кимегән – 24–39 сантиметрга.
Суның күтәрелүе нәтиҗәсендә тугайларны су баскан. Мәсәлән, Приозерная авылы янында Кече Чирмешән елгасы ярларыннан ташып чыккан – елга тугае бер метр су астында калган. Шундый ук хәл Чүти авылы янында, Гөбенә елгасында да күзәтелә.
Следите за самым важным и интересным в Telegram-каналеТатмедиа
Нет комментариев