Кыр эшләре башлана: Татарстанда 1,7 млн гектарда сабан чәчү планлаштырыла

Агымдагы атнада тугыз район хуҗалыклары чәчүлекләрне тукландыруга керештеләр. Бүгенгә 1 323 гектар көзге культуралар һәм 595 гектар күпьеллык үләннәр эшкәртелгән. Уңышны кыска вакыт эчендә саклап калу өчен 485 мең гектар уҗым культураларын һәм 309 мең гектар күпьеллык үләннәрне тукландырырга кирәк булачак. Көн саен 40 мең гектарда эш 20 көнгә якын дәвам итәчәк.

Агымдагы ел уңышы өчен аграрийлар 395 мең тонна минераль ашлама сатып алганнар, бу гектарга уртача 67,7 килограмм тәшкил итә. Соңгы ике атнада өстәмә рәвештә 49 мең тонна ашлама сатып алынган.

Бөртекле сабан культуралары орлыклары белән тәэмин ителеш 128 процент тәшкил итә. «Россельхозцентр» белгечләре 250 мең тоннадан артык ашлык чәчү сыйфатын тикшерделәр, бу тиешле күләмнең 100 проценттан артыграк. Ике атна эчендә күрсәткеч 8 процентка арткан. Кукуруз һәм көнбагыш орлыкларының 91 проценты, шулай ук шикәр чөгендеренең 100 проценты контрактта тотылган, кайтару график буенча башкарыла.

23 марттан 27 мартка кадәр республика районнарында Татарстан Республикасы Дәүләт техника күзәтчелеге һәм «Россельхозцентр» катнашында авыл хуҗалыгы предприятиеләренең чәчү кампаниясенә әзерлегенә комиссия тикшерүләре узды. 

Кадрлар белән тәэмин итүгә аерым игътибар бирелә. Хуҗалыклар, өлкән курс студентларын җәлеп итеп, колледжлар һәм югары уку йортлары белән актив хезмәттәшлек итәләр. Республиканың аграр уку йортларында 6,6 меңнән артык студент белем ала, шуларның 1,7 меңгә якыны кыр эшләре чорында практика узарга әзер, 1 меңнән артыгы хуҗалыкларга беркетелгән инде.