«Бәллүр каләм» республика конкурсына гаризалар кабул ителә башлады

Быел конкурста берничә мөһим үзгәреш кертелгән. Хәзер аеруча әһәмиятле проектларны республика башкарма хакимият органнары, муниципалитетлар, юридик затлар һәм массакүләм мәгълүмат чаралары редакцияләре дә тәкъдим итә ала.

«Татмедиа» агентлыгы җитәкчесе Айдар Сәлимгәрәев бу яңалыкны болай аңлатты:
— Без конкурс эшләрен тәкъдим итүнең яңа механизмын керттек. Хәзер процессларда авторлар гына түгел, хакимият органнары, муниципалитетлар, ММЧ оешмалары да катнаша ала. Бу республика медиакиңлегендә реаль йогынты ясаучы проектларны ачыкларга ярдәм итәчәк.

Быел призлы урыннар өчен премияләр күләме дә арттырылган. Гран-при иясенә Татарстан Республикасы җитәкчелегеннән «Лада Веста» автомобиле тапшырылачак.

Номинацияләр дә яңартылган. Алар арасында — «Елның иң яхшы медиапроекты». Бу номинация ММЧда һәм интернетта гамәлгә ашырылган аеруча резонанслы проектларны билгеләргә мөмкинлек бирә.