Яшүсмерләр өчен конфессия ара үзәк оештырыла

Мамадыш районында толерантлыкны ныгытуга һәм яшьләргә рухи-әхлак тәрбиясе бирүгә багышланган тагын бер пилот проектны тормышка ашырырга әзерләнәләр.

Август аенда Соколкада конфессия ара үзәк ачылачак. Анда православие һәм мөселман диннәрендә булган яшьләр бергәләп экскурцияләргә йөриячәкләр, мәдәни чараларда катнашачаклар. Программалар намаз, кичке дога кылу вакытларын исәпкә алып төзелгән. Үзәк 2нче августтан 9нчы августка кадәр эшләячәк. Яшүсмерләр Кирмәнчек шәһәрчегендә, “Изге касә” комплексында булачаклар; борынгы чиркәүләрне һәм мәчетләрне караячаклар; Болгарга, Казанга, Алабугага һәм башка истәлекле урыннарга сәфәр кылачаклар. Инициативаны районыбыз җитәкчелеге, Казан епархиясе, Мөселманнарның Татарстан диния назәрәте дә хуплады.