Татарстанда мотоцикл аварияләре: узган ел 17 кеше һәлак булган

Узган 2025 елда Татарстан юлларында мототранспорт катнашында 277 авария теркәлгән. Бу юл-транспорт һәлакәтләре нәтиҗәсендә 17 кешенең гомере өзелгән. Тагын 305 кеше төрле дәрәҗәдәге тән җәрәхәтләре алган.

Бу хакта ТР буенча Эчке эшләр министрлыгының Дәүләт автоинспекциясе идарәсе башлыгы вазифаларын вакытлыча башкаручы Айрат Сәмигуллин «Татар-информ» агентлыгында узган матбугат конференциясендә белдерде.

Айрат Сәмигуллин билгеләп үткәнчә, аварияләрнең күбәюенә берничә фактор тәэсир итә. Иң мөһим сәбәп – гомуми файдаланудагы юлларга питбайкларда чыгучы балигъ булмаган байкерлар.

Балалар һәм үсмерләр еш кына юл хәрәкәте кагыйдәләрен белми яки аларны бозып, үзләренә-үзләре куркыныч тудыралар. Питбайклар мотоцикллардан җиңелрәк булса да, алар да юлларда зур куркыныч тудыра.