Ярты гасыр бергә

 Роберт ага белән Кадрия ханым бер урамда гомер иткәннәр. Танышулары тумыштан булса, кавышулары Роберт абый армиядән кайткач була. Май аенда армиядән кайткан егетебез чибәркәй урамдашы артыннан йөри башлый. Эшне озак сузучулардан түгел ул, ноябрь аенда яшьләр өйләнешеп тә куялар. Кадрия Муллануровна почтада эшләп лаеклы ялга чыга, Роберт Әхәтович гомере буе күмәк хуҗалыкта шофер булып эшли. Бер-бер артлы җиде бала тәрбияләп үстерәләр - 4 малай, 3 кыз. Бүгенге көндә алар 10 оныкның, 1 оныкчыкның бәхетле әби-бабасы.
 Алтын кәләшебез яратып кроссвордлар чишә, бәйли, балалар кайтуына өстәл тутырып тәм-том әзерли. Роберт ага көнгә икешәр тапкыр балыкка төшеп менә, бакча тәрбияли, ди сөйгән яры турында Кадрия апа.