Мамадыш районында эре агросәнәгать оешмалары арасында спартакиада узды

“Сәламәтлек” дип исемләнгән ярышка 5 команда составында 249 спортчы килгән иде. Алар төбәгебезнең “АПК Азык-төлек программасы”, Кукмараның “Урал” ҖЧҖ, “Урал” СХПК, “Восток” һәм “Вахит” хуҗалыкларында хезмәт куючылар яки аларның балалары иде.
Спартакиаданың ачылышы “Дуслык” спорт комплексы каршындагы мәйданда үтте. “АПК Азык-төлек программасы” җитәкчесе, эшмәкәр Рифат Мотыйгуллин кунакларны сәламләп, барлык ир-егетләрне Ватанны саклаучылар көне белән тәбрикләп, матур теләкләрен ирештерде. Катнашучыларга уңышлар теләде. Аның искәртүенчә, Кукмара районындагы “Вахит” хуҗалыгы рәисе Нәфыйк Хөсәенов инициативасы белән моннан 13 ел элек уздырыла башлаган бәйгеләрдә мамадышлылар өченче ел рәттән катнаша. Быел үзләре кабул итәргә булганнар.
Ачылыш төгәлләнүгә кунакларны кайнар чәй, милли ризыклар белән сыйладылар, аннан биш мәйданчыкка бүленеп 17 спорт төре буенча ярышлар башланды. “Сәламәтлек” спартакиадасы хоккей, волейбол, канат тарту, чаңгы ярышы, гер күтәрү, милли көрәш, пневматик мылтыктан ату, армспорт, дартс, һәм башка төрләр буенча уза.
Бәйгенең баш хөкемдары Түбән Ушма урта мәктәбе директоры Илшат Шәйдуллин.
Киләсе елга спартакиада Кукмараның “Вахит” хуҗалыгы базасында үтәчәк.
 

Фото автора