Укытучы халкын гомер-гомергә иң намуслы, иң инсафлы, үзе укыткан укучыларының абый я апа дип ихлас елмаеп дәшүләрен үзенә карата булган иң зур ихтирам билгесе дип кабул иткән олпат затлар буларак санап килдек. Әле мин мәктәптә укыткан узган гасырның 80 нче елларында да бу шулай иде. Укучыларының бәйрәм саен үз куллары белән язган ихлас котлау сүзле 5 – 6 тиенлек открыткаларын хезмәттәшләремнең укытучылар бүлмәсендә бергә җыйналып укып, никадәр ләззәтле минутлар кичергәннәре әлегедәй күз алдымда. Хәзер заманы башка, диләр. Шуңамы, телевидение тапшыруларында, матбугат битләрендә булсын, берсен-берсе уздыра-уздыра мәгариф системасы коррупция чоңгылында, укытучыларны ришвәт коллары буларак күрсәтү модада.
