Мамадышта вакцинация ясатуы турында ялган белешмә алган ханым ковидтан вафат булды

Үз сәламәтлегеңә салкын караш, моңа һәрвакыттагыча төкереп карау безнең мамадышлыларның башларына сеңгән. Шул уңайдан без район үзәк хастаханәсенең баш табибы Дамир Хаҗиевтан төбәгебездә вирусның таралуы буенча хәлләр турында сораштык.

–Дамир Фаязович, соңгы вакытта вируслы пневмония белән чирләүчеләрнең саны артуы күзәтелә. Кызганычка каршы, үлүчеләр дә бар. Беркемгә сер түгел, күпләр авырганнан соң, медицина учреждениеләренә мөрәҗәгать итмичә, үзлекләреннән дәвалануны хуп күрәләр.

–Әйе, кызганычка каршы, күпчелек авырганнан соң, гадәт буенча күршеләре яисә танышлары дәваланганча дәвалана башлыйлар. Антибиотиклар эчәләр. Ә моны бүгенге киеренке шартларда эшләү, гомумән, тыела. Шуны искә төшерәсем килә: чирнең беренче билгеләре күренүгә үк кичекмәстән үзеңнең участок фельдшерына яисә табибыңа шалтыратырга кирәк. Алар дөрес дәвалану өчен квалификацияле киңәшләрен бирәчәкләр. Монда бер көн барысын да хәл итәргә мөмкин. Кайберәүләр кыйммәтле вакытларын кулдан ычкындырып, икешәр атна “дәваланалар”.

–Күптән түгел генә Мамадышта бер ханым вафат булды. Баксаң, ул прививка ясатмаган булган. Эш урынына ул вакцинация узу турында ялган белешмә күрсәткән. Моңа сезнең фикерегез нинди?

–Кызганычка каршы, мондый фактлар очрый шул. Сатып алынган сертификатлар кайчан да булса үзләрен сиздермичә калмаячак. Бу очракта ханым документны Яр Чаллыдан алган һәм аны үзе эшли торган район мәгариф бүлегендә күрсәткән. Ләкин ул федераль реестрда теркәлмәгән, аны берәү дә тикшермәгән. Димәк, QR-код та юк, дигән сүз. Ни кызганыч, без якты күңелле, яхшы кешене югалттык. Шуңа күрә мамадышлыларны сәламәтлекләре белән “шаярмаска” чакырам.

Дәвамы "Нократ" газетасынын киләсе санында.