Татарстанда күп балалы әниләр пенсияләрен арттыра ала

Бу яңалык пенсия исәпләгәндә кулланыла торган стаж һәм баллар системасындагы үзгәрешләргә бәйле.

Пенсия ничек формалаша?

Иминият пенсиясенә чыгу өчен кешенең ким дигәндә 15 еллык эш стажы һәм 30дан ким булмаган пенсия баллы булырга тиеш. Бала карау буенча 1,5 яшькә кадәрге ялда булу (декрет) вакыты да иминият стажына кертелә һәм бу чор өчен дәүләт тарафыннан махсус баллар исәпләнә.

Нинди үзгәрешләр кертелде?

Элеккеге кагыйдәләр буенча, пенсия исәпләгәндә зур чикләү бар иде: бер хатын-кызга дүрт баладан артык декрет ялы (гомуми алганда 6 елдан артык түгел) стажга кертелми иде. Димәк, биш яки аннан да күбрәк бала үстергән аналарның калган балаларын карау вакыты пенсия күләменә йогынты ясамый иде. Быелдан әлеге киртәләр тулысынча алынды: • Хәзер балалар санына карамастан, һәр сабыйны 1,5 яшькә кадәр караган барлык чорлар иминият стажына өстәләчәк. • Бу норма «кире көчкә ия», ягъни закон элек пенсиягә чыккан анарга да кагыла.

Ничек арттырырга?

Биш һәм аннан да күбрәк бала үстергән, инде пенсиядә булган Татарстан аналары түләүләрен яңадан исәпләтү өчен гариза бирә ала. Бу процесс автомат рәвештә башкарылмый, шуңа күрә мөрәҗәгать итү мөһим. Гаризаны ике юл белән тапшырырга мөмкин:

1. Дәүләт хезмәтләре (Госуслуги) порталы аша — электрон рәвештә;
2. Россия Социаль фондының теләсә кайсы бүлекчәсенә шәхсән барып. Бу чаралар «Гаилә» илкүләм проекты кысаларында күп балалы ата-аналарның социаль дәрәҗәсен күтәрүгә юнәлтелгән.