Татарстанда яңа туган сабыйлар өчен 244 бүләк җыелмасы тапшырылган

ТР Хезмәт, халыкны эш белән тәэмин итү һәм социаль яклау министрлыгы мәгълүматларына караганда, ел башыннан бирле бала тудыру йортларыннан чыкканда 244 гаиләгә беренчел кирәк-яраклар тупланмасы бирелгән. Шуларның 68е — махсус хәрби операциядә катнашучыларның гаиләләренә тапшырылган дип хәбәр ителә.

Бу ярдәм чарасы республикадагы яшәү минимумыннан түбәнрәк керем алган гражданнарга юнәлтелгән. Бүләк составына сабыйның беренче айларында кирәк булачак барлык әйберләр: комбинезон-трансформер, кокон-мендәр, киез итек, җылы юрган, төрле гигиена чаралары (сабын, шампунь, крем, порошок) һәм подгузниклар кертелгән.

Министрлык билгеләп үткәнчә, әлеге башлангыч «Гаилә» илкүләм проектының стратегик максатларын тормышка ашыруга хезмәт итә.