Татарстанда яңа ачылган гаилә үзәкләренә 80нән артык мөрәҗәгать теркәлгән

ТР Хезмәт, халыкны эш белән тәэмин итү һәм социаль яклау министрлыгы аңлатканча, бу үзәкләрнең төп өстенлеге — «бер тәрәзә» принцибы нигезендә эшләү. Бу ата-аналарга кирәкле социаль хезмәтләр турында тиз арада мәгълүмат алырга һәм шәхси проблемаларын хәл итүдә белгечләр ярдәменнән файдаланырга мөмкинлек бирә.

Министр урынбасары Юлия Абдреева сүзләренчә, үзәккә килүчеләрнең мәсьәләләре төрле:
•  Ата-ана хокукларын кайтарырга һәм балаларын опекадан алырга теләүчеләр.
•  Эчкечелек аркасында социаль куркыныч хәлгә төшкән гаиләләр.
•  Махсус хәрби операциядә катнашучыларның якыннары (социаль ярдәм һәм консультацияләр өчен).
•  Гаилә эчендәге үзара аңлашу проблемалары булган ата-аналар һәм балалар.

Мондый очракларда психологлар һәм социаль педагоглар кичекмәстән эшкә керешә: алар диагностика үткәрә һәм килеп чыккан низагларны хәл итү юлларын тәкъдим итә. 

Белгечләр һәр гаилә өчен шәхси ярдәм планы төзи. Кайберәүләргә бер тапкыр белгеч белән сөйләшү дә җитә, ә катлаулырак хәлдәгеләр белән эш даими рәвештә алып барыла. Исегезгә төшерәбез: бу үзәкләр «Гаилә» милли проекты нигезендә ачылды һәм эшли.