Кышкы «Күрше фест»ка 250дән артык гариза кабул ителде

Быел фестивальнең яңа катнашучылары бар – алар муниципаль учреждениеләр. Финанс ярдәме ике тапкыр арттырылып, 40 млн сумга җиткерелде. Бу хакта ТР Шәһәрләрне үстерү институтының вакыйга программалары кураторы Данил Данилов белдерде.

Данилов сүзләренчә, кышкы фестивальләрнең җәйгеләрдән төп аермасы — бюджет күләменең артуы һәм чараларны үткәрү вакытында үзгәрешләр.

«Бәйгенең бюджеты ике тапкыр үстерелде. Җәйге сезонда 20 млн сум булса, хәзер 40 млн сумга кадәр ярдәм күрсәтелә. Хәзер муниципаль оешмалар да катнаша ала, һәм чараларны өч календарь чорда оештыру кирәк булачак», — дип аңлатты куратор.

Бүгенге көнгә бәйгегә Татарстанның төрле районнарыннан 250дән артык гариза кергән. Киләсе кышкы сезонда чана шуу фестивальләре һәм ишегалды квестлары кебек бәйрәмнәр оештыру планлаштырыла.

«Бу сезонда бәйгегә үзмәшгуль гражданнарга караганда юридик затлар күбрәк гариза бирә. Тагын бер яңа шарт — чараларның колачын киңрәк итү өчен партнерлар җәлеп итү. Шулай ук, кышын саф һавада йөрү өчен бездә күбрәк сәбәпләр булачагын исәпкә алу мөһим», — дип аерым әйтеп узды ТР Шәһәрләрне үстерү институтының вакыйга программалары җитәкчесе.

«Күрше фест»ның кышкы бәйгесендә катнашу өчен гаризаларны быелның 28 ноябренә кадәр куршефест.рф сайтында тапшырырга мөмкин. Фестивальнең кышкы этабы 2026 елның 28 февралендә тәмамланачак. Республика бәйгесенең узган сезоны ТР Рәисе Рөстәм Миңнеханов ярдәме белән үткәрелгән иде һәм «Татарстанда Җәй» программасының бер өлеше булды.