1 июньдә Казан циркында «Созвездие-Йолдызлык» иң яхшы чыгышларын күрсәтәчәк

Халыкара балаларны яклау көнендә Казан дәүләт циркында «Созвездие-Йолдызлык» XXI ачык яшьләр телевизион фестивале лауреатлары һәм җиңүчеләренең бәйрәм концерты була.

«Матур тамаша, шулай ук сабын күбекләре һәм курчаклар белән күңел ачу уеннары көтә. Бәйрәм хөрмәтенә һәркемгә бушлай туңдырма өләшенәчәк», — ди фестивальнең матбугат үзәге.

Традиция буенча, Балаларны яклау көнендә республика җитәкчелеге вәкилләре быелгы «Созвездие-Йолдызлык» фестиваленең 40 лауреатына һәм җиңүчеләренә махсус дәүләт стипендияләр тапшырачак.

Фестивальнең генераль продюсеры Дмитрий Туманов билгеләп үткәнчә, бу проект Татарстан Президенты йөкләмәсе буенча гамәлгә ашырыла. «Созвездие-Йолдызлык» фестиваленең финал концертларын бөтен кеше дә карый алмаганга, киң күләмле итеп бу чараны уздыру карары кабул ителгән.

«Созвездие-Йолдызлык» фестивале — Татарстанның милли байлыгы. Фестиваль хәрәкәте концертын Казан халкы да күрә алачак. Һәм бу безнең беренче мондый тәҗрибәбез», — ди Дмитрий Туманов. Мондый хәйрия концертлары Татарстанда август һәм сентябрь айларында оештырылачак.

Циркта узачак бәйрәм концертында фестивальнең иң яхшы номерлары тәкъдим ителәчәк. Чара фестиваль гимны — «Кояш дискотекасы» җыры белән тәмамланачак.

Тамашага, алдан теркәлү шарты белән, керү түләүсез булачак. Алдан теркәлү өчен телефоннар: 238-00-63, 238-43-17. Урыннар саны чикләнгән. Чара барлык санитар таләпләрне исәпкә алып үткәрелә. Башлана 18:00 сәгатьтә.

Тулырак://tatar-inform.tatar/news/culture/26-05-2021/1-iyund-kazan-tsirkynda-sozvezdie-yoldyzlyk-i-yahshy-chygyshlaryn-k-rs-t-ch-k-5824696