Курай моңы китә еракларга

Кече Кирмән авылында оешып иҗат итүче "Сандугач" ансамбле чираттагы җиңүен яулады. Кичә Фарил Дөлмиев җитәкчелегендәге балалар коллективы Яр Чаллы шәһәренең 1нче балалар һәм яшьләр иҗат сараенда чыгыш ясады. Дәүләт автоном балаларга өстәмә белем бирү учреждениесе, Мәктәптән тыш эшләр республика үзәге, Яр Чаллының балаларга өстәмә белем бирү учреждениесе берлектә оештырган Иңгер Шәфыйков исемендәге "Моңлы курай-2012" II республикакүләм курайчылар бәйгесендә Татарстанның төрле шәһәр-районнарыннан барысы 20дән артык коллектив катнашты. "Сандугач"лылар лаеклы 1нче дәрәҗә диплом белән бүләкләнделәр.