Мамадышта туучылар саны кимегән

Быелның тугыз аенда Мамадышта 313 сабый дөньяга аваз салган. Шуларның 231 районыбыз бала тудыру йортында теркәлгән.

Узган елның әлеге чоры белән чагыштырганда, туучылар саны шактый ким. Бу турыда ЗАГС бүлеге мәгълүматларына нигезләнеп, үзәк хастаханә баш табибы Дамир Хаҗиев хәбәр итте. Хисап чорында 485 мамадышлы якты дөнья белән саубуллашкан. Туучылар белән аерма "минус" 172!

Кешеләр үлеменә китергән сәбәпләр арасында беренче урында йөрәк-кан системасы авырулары тора. Ә менә тышкы факторлар сәбәбендә вакытыннан алда вафат булучыларның 60% үз-үзләренә кул салучылар икән. "Суицид очракларының артып китүе уйланырга этәргеч бирә. Рухи-әхлакый тәрбияне көчәйтергә кирәк",- ди баш табиб.