Мамадышта җиләк пешә, кулларга өзелеп төшә

Мелиораторларның Калатаевскийдагы ярдәмче хуҗалыклары бакчасында бүген дә кура җиләкләре пешеп утыра. Аларны җыеп саткалыйлар да.
Көзгә кадәр җиләк бирә торган әлеге кураларны бирегә узган ел гына утыртканнар иде алар. Бер тоннадан артык уңышын җыеп сатарга да өлгергәннәр. Ә виктория җиләкләрен Мамадыш, Казан, Чаллы, Түбән Кама һәм Кукмара базарларында җиде тонна сатканнар. "Киләсе елда 11 гектардан 77 тонна җиләк сатачакбыз, Алла бирса",-ди "Мелиорация" ПМКсы генераль директоры Ринат Мостафин. Киләсе елны балык та сата башларга исәплиләр алар. Узган ел Калатаевскийдагы ике буага ике тонна карп, толстолобик, ак амур маймычлары алып кайтып җибәргәннәр иде.
Минневәрис МИНГАЛИЕВ