Тиеннәр мамадышлыларга шатлык өсти

Матур, йомшак йонлы җәнлекләр белән хозурланасыгыз, аларны сыйлыйсыгыз килсә, минизоопарк янәшәдә генә хәзер. Шәһәр стадион-ипподромы директоры Алексей Минькин сүзләренчә, әлеге өч тиенне Соколка авылында шушы төр җәнлекләрне үрчетү белән шөгыльләнүче гаиләдән сатып алып кайтканнар. Алар өчен алдан ук 4 х 2 метр зурлыгындагы махсус вольер әзерләнгән. Биеклеге 2,5 метрга тигез. Эчендә, өске өлештә кечкенә генә агач өйләр дә бар.

Тиеннәрнең рационында чикләвек, көнбагыш, җиләк-җимеш кебек продуктлар урын алган. Аларны һәркем сыйлый ала. Әмма моның өчен башта чаңгы базасы хезмәткәрләренә мөрәҗәгать итәргә кирәк. Киләчәктә бу вольерга тагын берничә тиен алып кайтырга уйлыйлар.