Сайлауның да җае бар

"Хәзерге вакытта базарларда һәм сәүдә нокталарында киң ассортиментта яшелчә һәм чәчәк орлыклары тәкъдим ителә. Уңыш орлык сыйфатына нык бәйле. Алданмас өчен нәрсәләргә игътибар итәргә? Сания."

Сорауга "Росселхознадзор" бүлекчәсе дәүләт инспекторы Рифкать Галимуллин җавап бирә:

-Сатуга куелган орлык партиясендә оригиналь таныклык булуы мәҗбүри. Анда орлыкның тишелеше һәм таныклыкның срогы күрсәтелергә тиеш. Пакетта орлыкны сатуга чыгарган оешманың исеме, адресы, телефон номерларына игътибар итәргә кирәк. Орлыкның сорты, тишелеше, партия номеры, массасы (граммнарда) яки саны (данәләп), сату срогы (числосы, ае һәм елы), стандартка (ТУ) туры килүе язылган пакетлардагы орлыкларны сату тыелмый. Әгәр маркировка бу таләпләргә җавап бирмәсә, андый орлыкны сатып алмау хәерлерәк. Шик туса, безгә 8(84364) 2-94-84 телефонына чылтыратып, киңәшә аласыз.