Шәһәр халкы футбол уйный

Кичә төгәл 18 сәгатьтә Мамадышның берьюлы 4 спортзалында шәһәр чемпионаты башланды. Мини-футбол уеннары оешма-предприятиеләр, учреждениеләр командалары арасында баручы 7нче Спартакиада кысаларында үткәрелә. Быелгы ярышта катнашырга 30 дан артык команда теләк белдергән. Араларында берничә коллективтан тупланганнары да бар. Мәсәлән, без, ягъни "ТАТМЕДИА"ның "Нократ" ("Вятка") филиалы көндәшләргә каршы Пенсия фонды хезмәткәрләре белән берлектә уйныйбыз. Кичә тәүге очрашуны "Олимп" спорт-сәламәтләндерү комплексында гадәттән тыш хәлләр бүлеге футболчыларына каршы үткәрдек. Уңыш- көндәшләр ягында иде.

Уеннар шулай ук 2нче санлы лицей, 87нче санлы ҺК һәм Түбән Ушмадагы спорт комплексында уза. Очрашуларның башлану вакыты дүшәмбе, чәршәмбе, җомга көннәрендә 18,19 һәм 20 сәгатьләрдә. Командалар җирәбә нигезендә 6 төркемгә бүленде. Биредә җиңү яулаганнар бәйгенең чираттагы этабына уза.