Ярминкә югары дәрәҗәдә узды

Бүген шәһәр үзәгендә чираттагы авыл хуҗалыгы ярминкәсе үтте. Бу юлы мамадышлыларга үзләрендә җитештерелгән продукцияне Тәкәнеш зонасы хезмәтчәннәре тәкъдим итте. Шәһәребездә көзге-кышкы ярминкәләр дәвам итә. Аларда шәһәр халкы да, авыл җитештерүчеләре дә бик теләп катнашалар. Чөнки биредә авыл кешесенә арадашчыларсыз сәүдә итү мөмкинлеге туа, ә сатып алучыга очсызлы продукция тәкъдим ителә. Районыбыз җитештерүчеләре, гадәтләнгәнчә, үзәк мәйданда сату итә. Бу юлы сәүдәнең оештырылышы өчен Тәкәнеш икътисадый зонасына караган җирлекләр, авыл хуҗалыгы оешмалары, бюджет учрежденияләре җаваплы иде. Иртәдән һәр өстәл тирәсенә чират тезелгән. Бу ярминкәдә тере казларны 1500 сумнан тәкъдим иттеләр, шулай ук куян, тавык һәм әтәчләр дә бар иде. Яхшы кулларга бушлай мәче баласына кадәр тәкъдим итәләр. Бүгенге ярминкәдә сәүдә нокталарының бизәлеше дә башкалардан аерылып торды. Шәмәк авыл җирлеге хезмәтчәннәре сату нокталарын Каз өмәсе узучы өй стилендә бизәгәннәр. Түрдә чигүле мендәрләр урын алган, стенага чигеп эшләнгән сөлгеләр элгәннәр.