Яшелләндерүдә балалар да катнаша

Мәктәп укучылары шәһәрне яшелләндерү эшенә үзләреннән өлеш кертәчәк. Хезмәт дәресләрендә балалар яңа утыртылган агач үсентеләрен саклау өчен махсус рәшәткәләр ясыячак. Бу, беренчедән, аларны эшкә өйрәтү булса, икенчедән, шәһәрне төзекләндерүгә балаларның да өлеше керәчәк, дигән сүз. Киләчәктә бу мәсьәләгә аеруча игътибар артачак. Хәзер агач утырту өчен һәр коллективка аерым урам бүлеп бирелә, һәр урамга аерым төр агачлар утыртыла. Алай гына да түгел, моннан соң һәркем үзе утырткан үсентенең тернәкләнеп китүе һәм алга таба үсүе өчен җавап бирәчәк.