“Мин үземә һәйкәл салдым...”

Республика урман хуҗалыгы тарихында тик бер генә кеше Социалистик Хезмәт Герое исеменә лаек булган. Ул якташыбыз- Иван Захарович Иванов. 15нче апрельдә аңа 85 яшь тулыр иде. Легендар шәхескә атап мемориаль такта ачу тантанасы нәкъ шушы датага туры китерелде дә. Анда сүз алган район башлыгы Анатолий Иванов, ТР Урман хуҗалыгы министрының беренче урынбасары Харис Мусин, тармакның экс-министры Әбүзәр Гаянов, аның элекке хезмәттәшләре, авылдашлары, туганнары күренекле шәхеснең якты истәлеген яңарттылар. Мемориаль такта Иван Захарович 1963-1992нче елларда җитәкчелек иткән Кама урман хуҗалыгы конторасы бинасына урнаштырылды.